《讀者請教》長篇
以前，我哋細個嘅年代，好多大人好鍾意整蠱小朋友，激嬲小朋友，以此為樂，激到小朋友發脾氣，然後話小朋友錯，話小朋友脾氣唔好，將自己嘅快樂建築喺小朋友嘅眼淚之上。時至今日，我以為呢種事已經唔再流行，誰不知竟然發生係我嘅小朋友身上。
幾年前，有一次男家家庭聚會，我同隊友一個沖奶一個餵奶比細B，大B(3歲)開始同親戚玩，初時好地地，只係講下呢樣係乜果樣係乜，好正常，誰不知我哋聽到小朋友開始發憫憎，出去一睇，原來親戚整蠱小朋友，所有野都話個小朋友唔啱話佢錯，我哋當時即刻帶開小朋友，話佢知「乖，你無錯。佢地唔識我哋可以話返比佢哋聽，爸爸媽媽知道你係啱嘅。」解決咗一次，隔一陣，佢哋又來第二次，小朋友自己攞玩具出嚟玩，佢自己玩得好地地，突然間佢哋又話小朋友，「你做乜咁蠢架，唔應該跟遊戲規則架，跟遊戲規則玩你就會輸，咁你咪好蠢囉！」小朋友覺得佢哋咁講唔啱，但駁唔到佢哋，好唔開心，隊友亦即刻帶走小朋友。嗰晚我哋用咗好長時間同小朋友傾，結果小朋友情緒都係好受影響，話以後都唔要再見到佢哋，隊友都決定以後唔再有呢類家庭聚會。
逢年過節，小朋友都唔肯出門口，每次見到親戚，小朋友都好抗拒，於是去得更加少。然後，親戚開始問長問短，好多長輩都有意見有怨言。作為媽媽嘅我，躺着也中槍，咁好啦，始終一場親戚，佢大個咗都要面對嘅，我就氹小朋友去見下佢哋，一次唔得，下次又再試，起碼紅白二事都露下面，但係小朋友始終唔願意見到佢哋，就算見到都避開佢哋。越係咁，佢哋越迫得緊，試過有次，突然去到我哋屋企樓下話要見，果次，隊友出手，諗住威逼利誘可以迫到小朋友出門口，點知。。。小朋友終於大爆發，歇斯底里，大喊大叫，追着隊友打，情緒崩潰到停唔到落嚟。呢一刻，隊友終於覺得好傷心，唔想再迫小朋友。我見到小朋友咁，個心真係好痛，雖然男家矛頭指向我，但係見到自己小朋友咁樣，有邊個阿媽忍心。
雖然已經事隔幾年，但係小朋友始終有個陰影，疫情期間，唔使佢出去食飯，但係就連FaceTime都唔想見。隊友有時都好想迫小朋友，迫唔到都會發我脾氣，有時我都會問自己，係咪我邊度做得唔夠好，係咪我用錯左方法，係咪真係我唔識教？講真，老人家嘅嘢，見得一次就一次，我都好想佢出去見吓人，但係，小朋友俾人蝦過俾人整蠱過，個心唔舒服，大人唔肯認(當面講過)，佢心結解唔開，我勸極佢都解決唔到個問題，唔通真係連我都唔企喺佢果邊？
真心求教，謝謝大家！
＃我的極品四大長老
Search